Azərbaycanda tur paketlər

Quba - Azərbaycanın ən böyük şəhərlərindən biridir. Yaşı ilk orta əsrlərə gedib çıxan Qubanın tarixi haqqında qədim alban və ərəb mənbələrində, Avropanın müxtəlif coğrafiyaşünaslarının əsərlərində bu və ya digər şəkildə bəhs olunmuşdur. Quba şəhərinin ilk təməl daşı XIV əsrdə qoyulmuşdur. Şəhər Bakının şimalından 170 km məsafədə, görkəmli dağlıq ərazilərdə yerləşir. Quba şəhəri, 18-ci əsrin ortalarında qurulan Quba xanlığının paytaxtı idi. Qafqaz dağlarının bir hissəsi olan Quba yaşıl təbiəti, meşələri və dağlıq əraziləri ilə cəlbedici mənzərələr yaradır. Yerli dağların möhtəşəm gözəlliyi Aleksandr Duma, rus yazıçısı Bestuzev-Marlinski, Norveçli Tor Heerdal və başqaları kimi tanınmış insanlar tərəfindən tərifə layiq görülmüşdü. Qubanın simvolları Azərbaycanın xaricində məşhur olan alma ağacları və gözəl Quba xalçalarıdır.

Memarlıq abidələrindən Ağbil türbələri (XVI əsr), Alpan kəndində Subaba türbəsi (XVI əsr), Birinci Nügədi kəndində məscid və minarə (XVII-XIX əsrlər), Xınalıq kəndində bürc, Qudyalçay üzərindəki Tağlı körpü və s. mühafizə olunur. Avropanın ən uca dağ kəndi sayılan Xınalıq kəndində IX əsrə aid Atəşpərəstlər məbədi, Ağbil kəndində XVI əsrə aid türbələr, Quba şəhərində XIX əsrə aid Səkinəxanım, Hacı Cəfər və Cümə məscidləri, Gümbəzli hamam vardır. Bundan başqa Rustov kəndində "Ələmu" adlı qala və tarixi məscid vardır.

Beynəlxalq standartlara cavab verən, xüsusi Qolf Dizaynı olan Milli Azərbaycan Qolf Klubu ölkəmizin ilk qolf ərazisi hesab edilir. Beynəlxalq Qolf Dizaynı və "Total Golf Construction" tərəfindən hazırlanan ərazi, Qafqaz dağları üzərində yerləşərək möhtəşəm görünüşlərdən zövq almaq üçün ideal bir məkandır. Dəniz və dağlar arasındakı vadidə yerləşən 18 dəlikli düzənlik, alma bağlarından və füsunkar bir çəmənlikdən keçərək ərazinin təbii xüsusiyyətləri haqda təssəvvür yaradır.